Ni-je Knotpeppels
Zoas elk jaor gaon wi-j in meert met de olde kammeroje van Leander de hof van Arpad een dag lang onderholden en oprume. Theo organiseert dat en nao de koffie met een breudje in de blokhut, gaon wi-j dan onder leiding van Theo 't bos snäöjen en de boel oprume, dat zich 't hele jaor zo het verzamelt tussen- en in de beum en struuk die d'r allemaol in staon.
In 1990 hef Leander 't stuk grond, dat mien vader aan Arpad het verkoch, veranderd in een grote tuun met een viever. Alleen de afmaetingen zun wat groter dan 'n gemiddeld tuuntje. Op de viever kö'j met een beutje rondvare, zo groot is den. Dat kömp umdat Arpad wat andere afmaetinge gewend is daor in Afrika, waor hi-j al jaore woont. 't Hele stuk is zowat 3 bunder en is veranderd in 'n bos, waor a'j goed in könt vertoeve, zeker as 't mooi weer is. Zien eige hof in Congo is net zo groot as hier een flinke boerderi-j. Hi-j kreg daor toch wel een ander idee van een höfke as wi-j hier hemme met onze schaarse grond. Eers had de gemeinte d'r nog moeite met de aanleg, maor later ginge ze toch aoverstag met eur bestemmingplan. Arpad wier der muuj van, want hi-j was Afrika gewend. Daor heit 't doen wa'j könt en hier is 't doen wa'j mag, en das niet völ. Of anders gezeg: daor mag alles maor ko'j minder en hier kö'j völ maor mag'ie haos niks.
Toen wi-j 's-marges aan de koffie zatte, kwam Theo met 't idee um de olde knotwilgen, eigelek zun dat knotpeppels, te vervange deur ni-je lote, zodat ze weer honderd jaor met könne. Ze zun al niet zo ni-j meer, want mien grootvader het ze nao de eerste wereldoorlog samen met zien zonen Gert en Beernd gepaot. In mien jeug waren ze al groot en wi-j moesse ze um de paar jaor snäöje. De takke wiere dan as takkebusse gebonde en aan 'n holtmiet gezet um ze te beware. Op de boerderi-j ko'j daor een hoop met doen. Gi-j konne ze gebruuke as onderste laog bi-j 't mietzette. De onderste laog garve wiere dan enigszins beschermp tege 't voch uut de grond, zodat ze minder gouw ginge rotte.
Wiejers ko-j 't natuurlijk goed as aanmaakholt gebruke veur de kachel en 't venuus. In elk geval, as 't jaor um was, dan was de holtmiet ook bi-jnao op. Maor de knotpeppels gräöjden hard en nao 'n paar jaor ha'j dan weer een ni-je holtmiet.
Nao de ruilverkaveling is onze boerderi-j afgebraoke en de knotpeppels kregge n andere eigenaar. Now hemme ze min of meer 'n beschermde landschap status gekrege. Ze staon d'r nog altied en worre af en toe gekneut, de letste keer geleuf ik deur de gemeinte. Theo von 't een goeie gedachte om ze van de ondergang te redde en d.m.v. een ni-je versie van de eigeste stam um ze veur de toekoms te beware. Ze harre zelfs nog in 'n bomenboek gestaon, umdat ze toch bezunder ware, die knotpeppels. 'n Goed idee van Theo, dat vonne wi-j ook en same met mien naef Ben he'we ni-je gepaot. Wi-j haope dat ze aanslaon en da'we d'r nog lang plezier van zölle hemme.
Azemer